ULAT SA LALAWIGAN NI
Kgg. Ramoncita P. Ong
Punong Lalawigan ng Aurora
Ika-22 ng Enero 2002

Kgg. Pangalawang Punong Lalawigan Annabelle C. Tangson, Kgg. na mga miyembro ng Sangguniang Panlalawigan, dating Punong Lalawigan na aking kabiyak, Eddie Ong, Inay, Gng. Natalia Ong, mga pinuno at kawani ng ibat-ibang tanggapan, sa mga panauhin, at sa lahat ng ating mga kababayan, magandang umaga po. 

Ako po ay nagagalak na kayo ay aking makasama sa paglalahad ng bunga ng ating pinagtulungang gawain at pagsisikap nuong nakaraang taon, gayon din sa pagpapaabot ng ating mga balakin para sa kasalukuyang taon.   

Kung inyo pong natatandaan, nuong ako ay manumpa sa tungkulin bilang Punong Lalawigan ay sinabi ko na ang “kaunlaran” na aking nais sundan ay (1) makatao na kung saan ang interes at kapakanan ng ating mga kababayan ay mapoprotektahan; (2) maka-kalikasan – na kung saan ay ating sisiguruhin na ang mga programa at proyekto ay makabubuti sa ating kapaligiran at (3) maka-Aurora na kung saan ang ating isusulong na mga programa at proyekto ay base sa pangangailangan ng lalawigan at nababagay sa “geographical features” ng Aurora. 

At dahil sa mga panuntunang ito ay masisiguro natin na ang Four (4) Point Agenda na aking inihain nuong Inaugural Address sa harap din ng kapulungang ito ay ating maipatutupad.

Una ko pong tatalakayin ay ang mga bagay na may kinalaman sa ECONOMIC DEVELOPMENT PROGRAM. Kung inyo pong napapansin, malaki ang pinagbago ng mga tungkulin at responsibilidad na dapat gampanan ng mga lokal na pamahalaan. Hindi po lamang ang pagbibigay natin ng serbisyo sa publiko ang ating concern, manapa’y iniaatang din sa atin ang pagpapalago ng ating lokal na ekonomiya. Napakabigat pong responsibilidad nito  lalo na sa isang maliit at mahirap na lalawigan.  

Kailangang tayo ay umisip ng mga pamamaraan kung paano tayo makatutugon sa hamon ng panahon na hindi maisasakripisyo ang ating mga likas na yaman at kagandahan ng kapaligiran. 

Dahil po dito ang mga programang ipinatutupad ng Provincial Agricultural Office, Provincial Veterinary Office, Provincial Fishery and Aquatic Resources Office, Provincial Cooperative Office at ng Provincial Tourism Office ay atin pong tinutuon sa pagpapapataas ng antas ng kabuhayan ng ating mamamayan at pagpapalago ng ating ekonomiya. 

Katulad halimbawa ng  “Binhian sa Lalawigan” project na sa pamamagitan ng ating pagtulong sa mga seed growers ay umaani ang ating mga magsasaka ng magandang uri ng palay na naipagbibili nila sa mataas na halaga bilang certified seeds. Patuloy din po nating ipinatutupad ang  “Plant Now Pay Later” scheme. 

Patuloy din tayong nagsasagawa ng mga pag-aaral kung paano natin mapapalakas ang produksyon ng ating mga sakahan. Nagpapautang din tayo ng mga post harvest facilities upang magamit ng ating mga magsasaka matapos mag-ani tulad ng instore dryer, mobile flash dryer at electric rice dryer. Sa ilalim ng programa ng Food Always In The Home (FAITH) project ay namamahagi tayo ng iba’t-ibang uri ng mga binhi ng gulay, kabuti at ng high value commercial crops at patuloy po tayong nagtuturo ng ibat-ibang paraan ng pagtatanim.  Ang coffee industry ay atin ding pinagtuunan ng pansin, dahil dito, ay gumawa tayo ng  Five (5) Year Provincial Coffee Development  Program (PCDP) na siya nating sinusundan upang mai-angat ang nasabing industriya.

Ang ating Provincial Veterinary Office ang nanguna sa pagpapatupad ng mga programa ukol sa pagpaparami at pangangalaga ng ating mga alagang hayop at may kabuuang 5881 beneficiaries ang ating natulungan sa buong lalawigan. Sa kasalukuyan tayo ay nag me-maintain ng ibat-ibang uri ng hayop para sa Animal Dispersal Program. Upang masigurong ligtas at walang sakit ang mga hayop na pumapasok at lumalabas sa ating lalawigan ay mahigpit nating ipinatupad ang pag-iissue ng quarantine permit. 

Kaya, sasamantalahin ko po ang pagkakataong ito upang hilingin sa Kgg. Sangguniang Panlalawigan ang pagpapasa ng isang ordinansa na nagtatakda ng bayad sa pag-iissue ng Veterinary Health Certificate at Shipping Permit.  

Ang tanggapan naman ng Fishery and Aquatic Resources ang nanguna sa pagpapatupad ng mga programa ukol sa pag-aalaga at pagpapaparami ng isda. 313,355 fingerlings mula sa ating Tilapia Breeding Center ang ating naipamahagi sa mga fishpond cooperators sa buong lalawigan. Sila ay nanguna din sa pagre-research at  pagpapatupad ng mga Fishery Laws, rules and regulations. 

Ang Provincial Cooperative Office ay patuloy na tumutulong upang mapalakas ang mga kooperatiba sa buong lalawigan. Nakapag pautang tayo ng kulang na kalahating milyon (P471,000.00) na nakapag-benepisyo sa 9 na kooperatiba at 55 na individual borrowers. 

Ang programa po natin sa turismo ay nag uumpisa pa lamang at napakarami po ng ating dapat gawin. Isa sa ating mga naumpisahan nuong nakaraang taon ay ang initial na pagpaplano kung paano tayo magka-capitalize sa eco-tourism sa limitadong pondo ng ating pamahalaan. Marami po tayong binabalak ipatupad na mga gawaing pang turismo, na sa mga susunod na panahon ay inaasahang magbibigay sigla sa ekonomiya ng ating probinsya. Ilan po dito ay ang pagde-develop ng ibat-ibang eco-tourism sites sa Aurora sa tulong ng ating mga Pamahalaang Bayan; ang pag-organisa ng mga tourism events tulad ng surfing competition, Festival at package tour. Nagsisikap din po tayo na makilala ang ating lalawigan sa pamamagitan ng promotion sa telebisyon at iyan po ay atin ng naumpisahan sa tulong ng Lakbay TV at Sports Unlimited. 

Natutuwa po akong ibalita sa inyo na nuong kami ay magtungo sa Office of the Presidential Adviser for Northern Luzon kasama ang ilang kagawad ng Sangguniang Panlalawigan at Department Heads ay ibinalita sa amin ni Undersecretary Diaz ang plano ng ating pangulo para sa lalawigan ng Aurora, sakaling tayo ay mapabilang sa Region III. Isa po sa nakikita na magiging benepisyo nito sa atin ay ang paglago ng ating turismo. Nabanggit po ni USEC Diaz na ang pagbubukas ng President Diosdado  Macapagal International Airport sa Clark Field Pampanga ay inaasahang makaka-akit ng mga turista mula sa ibat-ibang bansa at ang mga turistang ito ay kukumbinsihin ng North Philippine Tourism Council na magtungo sa ibat-ibang bayan ng Northern Luzon, na kung saan ang Aurora ay isa sa magiging destinasyon. At ang pag de-develop ng national government sa Fort Magsaysay bilang economic zone ay makatutulong ng malaki sa trade and commerce ng ating lalawigan.  

Ang plano pong ito sa tingin ko ay makabubuti para sa atin sapagkat ang malaking halaga ng investment para sa lubos na pag-papaunlad ng ating lugar ay hindi kayang balikatin ng kagaya nating maliit na lalawigan. At dahil dito ay naniniwala ako na ang mungkahi ng ating mahal na pangulong Gloria Macapagal-Arroyo ng siya ay dumalaw sa bayan ng Casiguran noong September 20 noong nakaraang taon, na tayo ay mapabilang sa Region III ay ating dapat sang-ayunan sa lalong madaling panahon.

Dadako po naman tayo sa 

ENVIRONMENTAL MANAGEMENT

Mawawalan ng saysay ang ating pagsisikap na umunlad kung ang ating kapaligiran ay hindi mapapangalagaan.  

Sa ilalim po ng tanggapan ng Environment and Natural Resources ay ating patuloy na pinapangalagaan ang ating kabundukan at tinutulungan  ang mga magsasaka na duon ay namamalagi upang pagyamanin ang lupa na pinahiram sa kanila ng pamahalaan. Dahil isa sa aking prioridad ang pangangalaga ng kalikasan at ang  pagpapanatili ng luntiang kapaligiran ay minarapat ko na mag-create ng Task Force Bantay Kalikasan. Sa tulong ng ating Philippine Army, Philippine National Police, DENR, DOJ at NGOs ay ating inaasahang mahigpit na maipatutupad ang ating mga environmental laws, rules and regulations. Bahagi pa rin ng ating program ukol sa environment ay ang Clean and Green Program na isinusulong din ng ibat-ibang pamahalaang bayan. Patuloy din ang isinasagawa nating kampanya ukol sa Solid Waste Management at ang pagtatalaga sa Task Force Clean and Green upang tumulong sa iba’t-ibang bayan ng ating lalawigan na mapanatili ang kalinisan. Sa kasalukuyan ang PTFC&G ay nakikipagtulungan sa Pamahalaang Bayan ng Baler upang magkaroon ng dump site. Isinasaayos na ng ENRO ang requirements katulad ng Geological Assesment Report upang ito ay maipresenta sa mga mamamayan para sa social acceptability. 

Ang Provincial Mining Regulatory Board ay naging maingat sa pagi-issue ng quarry permit at naging efficient din tayo sa pangongolekta ng mga fees at taxes ukol dito na humigi’t-kumulang sa 1.8 M. 

SOCIAL DEVELOPMENT                   

Sa larangan po ng Social Development ay ating lubos na sinuportahan ang mga gawaing pangkabataan, na isa sa mga naging dahilan sa pagkakamit ng isang parangal, bilang pinakamahusay na SK sa Pilipinas ng ating kinatawan ng Pederasyon ng Sangguniang Kabataan sa Sangguniang Panlalawigan na si Bokal Shierwin Taay. Nakipagtulungan ang inyong pamahalaang panlalawigan sa PNP upang maorganisa ang isang samahan ng mga kabataan upang sila ay malayo sa paggamit ng ipinagbabawal na gamot. Ang nasabing samahan ay tinawag na Ilegal na Paggamit ng Droga Ayaw ng Mamamayang Aurora na may akronim na IPADAMA. Ang proyektong ito ay ating ipagpapatuloy sa pamamagitan ng pagsasagawa ng seminars sa iba’t-ibang bayan upang ating mapalawak ang mga activities at maparami ang miyembro ng organisasyon. 

Bilang pagkalinga sa ating mga mahihirap na mga kababayan ay patuloy nating ipinatupad, sa pamamagitan ng Provincial Social Welfare and Development Office (PSWDO), ang mga programa ukol sa pagbibigay ng tulong pinansiyal sa mga biktima ng kalamidad, gayon din sa mga taong nasa gipit na kalalagayan. Natulungan din natin sila sa pamamagitan ng pagpapahiram ng tulong puhunan at pagbibigay ng disenteng tahanan na tinatawag nating Core Shelter. Dahil na rin sa kakulangan ng pondo ay hindi natin lubos na maipagkaloob ang lahat ng mga kahilingan para sa pabahay. Subalit sinisiguro naman natin na taun-taon tayo ay palagiang may nakalaang pondo upang ang iba pang pamilya na nagangailangan ay ating mapaglingkuran. Lubos din ang ating naging pagpapahalaga sa Senior Citizen, gayon din sa mga kababaihan. Tinulungan po natin sila sa pamamagitan ng pag-bibigay ng kaukulang pondo para sa pagtatayo ng sariling hanap-buhay.  Mahalaga at malawak ang ating programa sa mga munti nating kabataan, sa pakikipagtulungan ng UNICEF ay ating isinusulong ang Child Friendly Movement sa buong lalawigan sa ilalim ng 5^th Country Programme For Children or CPC V.               

Ang nutrition program ay ipinatutupad ng Provincial Nutrition Council at Provincial Nutrition Action Office na patuloy na nakikipag-ugnayan sa mga Pamahalaang Bayan at mga Municipal Nutrition Council upang ating mapababa ang insidente ng malnutrition.               

Alam natin na ang pondong inilaan ng pamahalaang panlalawigan ay hindi sapat upang matugunan ang ating suliranin sa malnutrition. Kung kaya  hinihiling ko rin ang ibayong tulong ng mga Punong Bayan at ng ating mga kababayan upang ating magkatuwang na ma-improve ang ating programa ukol sa nutrisyon. Ito po ay hindi lamang concern ng Pamahalaang Panlalawigan, o di kaya ng Pamahalaang Bayan. Ito po ay responsibilidad nating lahat bilang tao. Sa kasalukuyan at sa susunod pang mga taon ay inaasahan ko na tayo ay mas higit pa  na magkakatulong-tulong ukol sa pagpapatupad ng nutrition program sapagkat ating ia-apply  ang multi-sectoral partnership approach  upang tugunan ang mahalagang concern na ito.               

Ang kalusugan ay isa sa aking prioridad at dahil dito ay layunin ko na mapabuti pa ang serbisyo ng mga ospital. At dahil nga sa kagustuhan natin na higit na mapagbuti pa ang serbisyo ng ating ospital ay nag-engage tayo ng services ng mga magagaling na Surgeon o surihano mula sa ibat-ibang malalaking ospital sa Maynila. Bukod po sa serbisyong ito ay sinikap ko na mabigyan ng libreng serbisyong pangkalusugan ang mahihirap nating mamamayan sa pamamagitan ng pagsasagawa ng Medical at Surgical Missions sa tulong ng Philippine Charity Sweeptakes Office (PCSO) at Manila Sanitarium and Hospital. Bunga ng aking pakikipag-ugnayan sa Department of Health - Region IV ay nabigyan din tayo ng mga gamot. At dahil sa kagustuhan natin na mapangalagaan ang kalusugan ng ating mga kababayan tayo ay naglaan ng pondo na nagkakahalaga ng P 500,000.00 ngayong kasalukuyang taon upang ang humigit kumulang 1,700 na mahirap nating mamamayan ay magkaruon ng health insurance na kanilang magagamit anu mang oras na sila ay magkaruon ng karamdaman. Katulong po natin ang PHILHEALTH upang ito ay matagumpay nating maisagawa. Layunin ko rin po na maipagpatuloy ang plano ng ating dating  Punong Lalawigan na maiayos ang pisikal na istraktura, kagamitan at serbisyo ng Aurora Memorial Hospital sa pamamagitan ng pagtatayo ng bago at modernong ospital sa Brgy. Reserva, dito sa bayan ng Baler, na strategically located sa gitna ng central towns.               

Ang pagpapatayo ng isang modernong ospital ay isasagawa natin sa pamamagitan ng pag-utang sa Landbank of the Philippines na nuon pa man ay atin ng katuwang sa pagpapaunlad ng lalawigan. Ito po ay hindi naman magiging mabigat para sa atin sapagkat ito ay self-liquidating project. Inaasahan ko na ang ating kapwa lingkod ng bayan na nasa Sangguniang Panlalawigan ay sasang-ayon sa planong ito sapagkat ito ay para sa kapakanan nating mga mamamayan ng Aurora.  Sa pamamagitan nito ay makakaakit tayo ng mga dalubhasang manggagamot na siya nating lubhang kailangan sa ngayon.               

Dahil sa dedikasyon sa gawain at mabuting pamamahala ng ating Division Superintendent, mga Supervisors, mga Punong Guro at Guro ay mataas ang bahagdan ng ating performance indicator nuong nakaraang taon batay sa ulat ng Department of Education (DepEd). Bilang ina at Punong Lalawigan ay aking lubos na sinusuportahan ang sektor ng Edukasyon. Pinatunayan ito ng mga naging prioridad sa Budget ng Provincial School Board at ng iba pa nating inilaan na pondo mula sa ating Annual Budget para sa pagpapatupad ng Scholarship Program, Special Program For Employment of  Students at scouting activities. Akin ding sinusuportahan ang Non-Formal Education (NFE) sa pakikipagtulungan ng TESDA sa pagsasanay ng mga kabataan, kababaihan at ng iba pa nating kababayan upang ma-develop ang kanilang skills. Noong nakaraang taon, tayo ay nakapagpadala ng dalawang (2) representatives sa Asean Skills Competition na ginanap sa Bangkok, Thailand at dito sila po ay nagkamit ng unang gantimpala sa Furniture Making category at pangalawang gantimpala naman sa Joinery category. Nanalo rin ang ating representative, ng Gold Medals sa Furniture & Cabinet making at Smoked Fish Processing categories noong September 2001 sa Philippine National Skills Competition na ginanap sa Davao. At ang nagwagi dito ay ang ating representative sa Furniture & Cabinet Making - Youth Category na lalahok muli sa Asean Skills Competition sa Jakarta, Indonesia ngayong October 2002. Ang mga kaalamang ito ay kailangan natin sa pagtatayo ng hanapbuhay na makakatulong sa pagpapaunlad ng ating ekonomiya. Nais kong ipaabot sa mga nagwagi na ikinararangal sila ng ating lalawigan kung kaya’t sila ay ating prioridad upang makapag-avail ng pondo mula sa ating livelihood program. Kaya huwag nating palampasin ang panahon at tayo ay mag-aral at tuklasin ang mga bagong kaalaman sa pamamagitan ng programa ng TESDA at ng inyong Pamahalaang Panlalawigan.               

Ang ating mga guro at mag-aaral sa ilalim ng Special Education (SPED) ay masasabi nating equally competitive sa ibang lalawigan sapagkat nuong nakaraang taon sila’y nagkamit ng maraming karangalan sa 2001 Regional Special Games for the Physically Abled na ginawa sa Candelaria, Quezon.               

At naging katuwang din natin ang DepEd sa pagpapatupad ng dalawang (2) Foreign Assisted Programs ang CPC-V at Third Elementary Education Project (TEEP) upang patuloy na mapaghusay at maitaas pa ang bahagdan ng mga performance indicators tulad ng level of participation, completion at graduation.               

Mahalaga po sa akin ang pakikipag-konsultasyon sa inyo na aking mga kababayan. Kung kaya’t ako po ay nagtalaga ng isang araw sa isang linggo, Araw ng Miyerkules, bilang People’s Day. Sa araw pong ito ay tiyak na makakaharap ako ng ating mga kababayan upang dinggin ang kanilang pangangailangan. Alam po ninyo, napakarami ng gawain ng isang Punong Lalawigan tulad ng pamamahala ng iba’t-ibang tanggapan sa Pamahalaang Panlalawigan, pagdalo sa mga pagpupulong dito at sa kamaynilaan at ganon din ang pagdalaw sa iba’t-ibang barangay na nagiging dahilan kung minsan ang hindi ako maabutan sa aking tanggapan ng ating mga kababayan lalo’t higit yong mga nagmula pa sa malalayong lugar.               

Sa pamamagitan po ng People’s Day ay makatitiyak sila na ako ay kanilang makakapanayam, ngunit di po ibig sabihin nito ay hindi na ako tatanggap ng panauhin sa ibang araw. Patuloy pa rin po ang aking pagtanggap ng mga nais makipag-usap sa akin maging sa aking tanggapan o sa aming tahanan.               

Natutuwa rin po akong ibalita sa inyo na sa maikling panahon pa lamang ng aking paglilingkod sa inyo ay na-appreciate na ang aking efforts at prinsipyo, sapagkat ang inyong lingkod po ay napagkaisahang mapili bilang Regional Chairman ng Sectoral Committee on Social Development ng Regional Development Council. This coming year, I am confident that we would have a better access to the social development programs of the National Government and other institutions in close collaboration and partnership with NEDA and the different national government agencies.

INFRASTRACTURE DEVELOPMENT               

Bilang suporta sa iba pa nating development efforts ay ating pinagsisikapang makapagpagawa ng mga basic at major infrastracture projects na kailangan ng ating lalawigan. Ating palagiang pinagtataanan ng pondo sa ating budget ang mga basic social infrastracture tulad ng mga silid-aralan, Day Care Centers, Health Centers at Brgy. Multi-Purpose Hall na kailangan ng ating mga barangay.               

Ang pagsasa-ayos ng pinagkukunan ng maiinom na tubig ay atin ding prioridad kung kaya ito ay ating ipino-programa taun-taon hanggang sa ito ay tuluyan nating maisaayos. Ang kabuuang halaga po na inilaan dito nuong nakaraang taon ay P2,360,000.00. 

At ngayong taon ay matatapos na ang ating pagpapatupad ng Rural Waterworks Supply, Sanitation, Sector Projects (RW3SP) – isang Asian Development Bank - Assisted project na ating ipinatupad sa loob ng 5 taon na kinabibilangan ng Spring Development, pagpapagawa ng mga deep well at shallow well at pipe laying distribution na nagkakahalaga ng 5.29 M. Nagkongkreto at nag maintain din tayo ng mga Provincial Roads at nagpagawa tayo ng mga tulay. Pinaplano kong ipa-convert ang iba pa nating Provincial Roads into a National Road tulad ng Poblacion-Umiray Road sa bayan ng Dingalan, at Casiguran - Dilasag Road upang mas mataanan ng malaking pondo at maisaayos ng lubos ang maintenance nito ng national government. Ngayong taon ay maglalagay na po tayo sa Casiguran Sub-Office ng permanenteng mga equipment tulad ng 2 Dump trucks, 1 Loader at 1 Grader upang palagiang magsaayos ng iba’t-ibang lansangan sa tatlong bayan sa norte. Nagsa-ayos din tayo ng mga drainage at nagtayo ng mga kongkretong istruktura upang pigilan ang pagbaha.               

Naging supportive tayo sa mga proyektong rural electrification at dahil diyan ay palagian tayong nakikipag usap sa AURELCO, NAPOCOR, NEA at DOE kung paano natin higit pang mapagbubuti ang serbisyo ukol sa elektrisidad sa buong lalawigan. At nuon pong October 28, 2001 ay aming nilagdaan ang isang Memorandum of Agreement ukol sa “O Ilaw Project” ng ating mahal na Pangulo Gloria Macapagal - Arroyo ukol sa energization ng 22 barangays sa Aurora na wala pang serbisyo ng elektripikasyon. Sa taong ito ay pitong (7) barangay sa Ma. Aurora at isang (1) barangay sa Dilasag ang nakatakdang mailawan na nagkakahalaga ng P13,972,916.64 mula sa DOE at NPC.               

Kaugnay pa rin po ng rural electrification projects, ang kahilingan ng ating dating Punong Lalawigan Eddie Ong na installation ng dalawang (2) Units na bagong generator para sa Casiguran Power Plant ay sinangayunan na ng National Power Corporation. At batay po sa aming pag-uusap ng pangulo ng NPC na si G. Alcardo, ito’y ganap na mai-instila sa Casiguran ngayong 3^rd quarter ng taon, bahagya po itong maaantala dahilan sa mga proseso na dapat pang sundin tulad ng bidding at procurement bago pa ang ganap na installation ng nasabing generators. Dahil po dito ay masisiguro na natin ang 24 na oras na serbisyo ng elektripikasyon sa DICADI.

Minarapat ko, na ang mga plano nating  isagawang infrastructure projects, ay maihingi ko ng tulong sa mga senador. Si Senador Cayetano ay nangako na kanyang lalaanan ang pagkokongkreto ng isang portion sa Dipaculao-Maria Aurora road na nagkakahalaga ng P6.0M, at si Senador Magsaysay naman ay nagcommit na kanyang susuportahan ang ating water works projects na nagkakahalaga ng P2.0M. Bago po ako umuwi ay lumapit din ako sa National Housing Authority upang tayo ay mapagkalooban ng pondo sa pabahay. At si GM Pamintuan ng NHA ay nagcommit na tayo po ay kanilang tutulungan ng halagang P8.0M para sa Site Development ng ating housing project. Maliban po dito ay kanila ring ipinagkaloob ang kahilingan ng ating dating Punong Lalawigan na tulong para sa 161 na  pamilya na nasalanta ng mga nagdaang bagyo na nagkakahalaga ng P1.61 million sa ilalim ng Emergency Housing Assistance Program (EHAP). 

At nais ko pong ibalita sa inyo na ang pagpapatupad sa Arterial Road Links Development Projects funded under the 22^nd Yen Loan Package ng JBIC na sinimulan pa noong panahon ng dating punong lalawigan, ay ganap ng isasagawa sa taong kasalukuyan. Uunahin po dito ay ang package four (4) (ang pagkokongkreto ng Bazal Maria Aurora-San Luis road) at paggagawa ng 4 at pagre-pair ng mga kongkretong mga tulay na dadaanan nito na may halagang humigit kumulang P560M.  

Sa pagdalaw po ng ating mahal na pangulo sa Casiguran noong Setyembre 20, 2001 ay tumanggap tayo ng P5.0M para sa pagpapagawa ng tulay sa Pacugao River. Kaya sa pagkakataong ito ay nais kong ipaabot ang aking pasasalamat kay pangulong Arroyo sa kanyang patuloy na pagkalinga sa lalawigan ng Aurora.               

Ako po ay nagsisikap na makipag-ugnayan sa lahat ng maaaring makatulong sa ating suliranin ukol sa telecommunication partikular sa pagkakaruon ng cellsite sa Aurora upang ito ay magkaruon na ng kaganapan. Nahihirapan po tayo na mag demand sa mga telecommunication companies na madaliin ang paglalagay ng nasabing pasilidad sapagkat sang-ayon sa kanilang pag-aaral ay napakalaki ng magiging investment nila sa proyektong ito. Ngunit huwag po tayong mawalan ng pag-asa at sisikapin ko sa pamamagitan ng paghingi ng tulong sa matataas na pamunuan ng national government ay matupad ang proyektong ito. 

Ako po ay lubos na nagpapasalamat sa Panginoon dahil sa loob ng anim na buwan pa lamang ng aking paglilingkod sa ating lalawigan ay patuloy nating nadarama at nakikita, na sa kabila ng mga kahirapan na dinaranas natin ay nanduon pa rin ang pag-asa at mga oportunidad upang ang ating lalawigan ay tuluyang umunlad. 

Aaminin po natin na nuong nakaraang taon ay nadama natin ang matinding paghihirap ng pamahalaan dahil sa palagiang pagkaantala at kulang na releases ng Internal Revenue Allotment o IRA sa mga LGUs. Ito po ay naging isang malaking hamon sa akin bilang Punong Lalawigan- ang balansehin ang mga gastusin ng pamahalaan. Para po sa inyong kabatiran, nuong nakaraang taon ang ating pinagtibay na budget ay may kabuuang P 251, 410,577.00 at ang ating nagugol para sa mga proyekto at operasyon ng Pamahalaang Panlalawigan ay humigit kumulang sa P193 milyon lamang, dahilan sa mga cost-cutting measures na ating ipinatupad, sapagkat batid natin na hindi natin mare-realize ang ating expected income na siya ngang nangyari dahilan sa ang kabuuang income mula sa IRA at local taxes ay umabot lamang ng mahigit sa P 182 milyon. Kung inyo pong susumahin, sa kabila ng ating ginawang pagtitipid ay nagkaroon pa rin tayo ng mahigit sa  P 11 milyong deficit. Lahat po ng LGUs ay nasa ganitong sitwasyon sa kasalukuyan dahilan nga sa kakulangan ng IRA na kanilang tinatanggap sa ilang sunod-sunod na taon. Mabuti pa nga po ang ating kalalagayan sapagkat sa sandaling matanggap natin ang  P 2 M na ating mari-reimburse mula sa President’s Bridge Program  sa ilalim ng DILG, ang ating share sa utilization ng national wealth na umaabot sa humigit kumulang na P 1.7 milyon at ang ating receivable na IRA na nagkakahalaga ng mahigit P 14 milyon, na maibibigay sa atin sa pamamagitan ng bond floatation na ginagarantiyahan ng national government ay magkakaroon pa tayo ng surplus na kulang na P 7 milyon.

Dahilan nga sa kulang at delay na pag re-release ng IRA ay agad tayong nagkaruon ng mga adjustments at pagbabago sa pamamahala. Pinagtuunan natin ng pansin ang pamamahala sa loob ng ating malaking organisasyon at dahil dito ay unti-unti nating isinasa-ayos ang mga tanggapan, ang mga sistema at proseso na akma sa kasalukuyang sitwasyon. Ipinanukala ko ang palagiang pagtitipid sa paggastos at paggamit ng mga resources ng pamahalaan na hindi naman masasakripisyo ang uri ng serbiyo na ating binibigay. Umaasa akong ito ay magiging bahagi ng kultura ng ating organisasyon at ng ibat-ibang tanggapan ng pamahalaan. Binawasan natin ang bilang ng mga casual employees ng mahigit sa 50% at aking hinikayat na imaximize ang bawat oras ng ating mga permanenteng kawani, kaalinsabay ang ating pagiging istrikto sa pagpapatupad ng iba pang cost-cutting measures gaya ng pagreregulate ng travel, overtimework at pagbili ng mga office supplies. Nagpapasalamat po ako sa pang-unawa ng marami ngunit may mangilan-ngilan po na mga hindi agad nakaunawa sa aking ginawa kung kaya nais kong ipaabot sa ating mga kababayan na ito po ay kailangan nating gawin dahil ito ang hinihingi ng pagkakataon.     

Hinihikayat din natin ang patuloy na pagtutulungan ng ating mga GOs at pribadong sector para sa maayos at mabisang pagpapatupad ng mga programa at proyekto ng lokal na pamahalaan.  

Despite the difficulty we have experienced, I still believe that capacity and capability building program should be sustained to ensure productivity, effectiveness and efficiency of our employees. 

Hindi po magiging matagumpay ang ating mga ginagawang pagsisikap kung ang ating komunidad ay wala namang kaayusan at katahimikan. Kaya sasamantalahin ko ang pagkakataong ito upang pasalamatan ang mga bumubuo ng PNP, DILG, Philippine Army, Regional Trial Court, Municipal Trial Courts, IBP Aurora Chapter at DOJ sa kanilang concerted efforts upang mapanatili ang kaayusan at katahimikan ng ating lalawigan at masiguro ang mabilis na paggagawad ng hustisya sa ating lugar. Base sa ulat ng PNP sa nagdaang taon ay 91.81 % ang crime solution efficiency rate sa lalawigan at ang bilang ng krimeng naganap ay bumaba mula walumpu, ito ay naging pitumpu’t-lima. Nagsagawa ang Philippine Army ng 3,404 combat operations sa buong lalawigan bilang bahagi ng anti-insurgency campaign ng pamahalaan. Naging abala rin sila sa pagpapahusay pa ng kanilang relasyon sa komunidad at sa mga lokal na pamahalaan at dahil dito ay nakasama natin sila sa iba pang mga gawaing pangkaunlaran na pinatupad ng Pamahalaang Panlalawigan katulad ng pangangalaga ng ating kalikasan, sa pagbubuo ng mga kooperatiba at pagsasagawa ng FAITH gardening. Dahilan din po sa kanilang initiative ay naitatag ang Area Coordinating Center.  

Kamakailan lamang, may nakarating pong ulat sa aking tanggapan na may nagsimulang mag-operate ng jueteng sa ilang bayan ng ating lalawigan. Dahil dito, ay kaagad kong inatasan noong January 11, 2002 si Police Superintendent Moises Guevarra na agad sugpuin ang jueteng operation. At ako naman ay nagpapasalamat sa kanyang kaagad na pagtugon na naging dahilan ng pagkakahuli ng ilan na sangkot dito. Nais ko pong ipaabot sa ating mga kababayan na sa ilalim ng aking pamamahala ang ganitong uri ng ilegal na sugal ay hindi ko mapapayagan. Kung kaya, inaasahan ko na kayo ay magiging vigilant dahilan sa ang ganitong uri ng operasyon ay hindi madaling supilin kung wala ang kooperasyon ng taong bayan. 

CONCLUDING REMARKS 

Ating patuloy na palalakasin ang ating sektor ng Agrikultura; lalong-lalo na ang mga agri-based industries ng probinsiya. Ating sisiguruhin ang patuloy na paghahatid ng basic social services sa pamamagitan ng ating mga programang pangkalusugan, nutrisiyon, social welfare at edukasyon.  

Ating isasagawa ang mga kinakailangang basic at major infrastracture projects na siyang pangunahing kailangan sa pagpapa-unlad ng ating ekonomiya. Ang ating pangangalaga sa kalikasan at kapaligiran na siya nating malaking puhunan sa pagpapa-unlad ng turismo at sustainable development, ay ating ipagpapatuloy sa tulong ng mga opisyal, kawani at mamamayan ng (8) walong bayan. At upang mahusay na magampanan ng mga kawani at opisyal ang kani-kanilang tungkulin ay ipagpapatuloy natin ang mga capacity at capability building program. Pag-iibayuhin po natin ang pakikipagtulungan sa sector ng mga kababaihan, senior citizen, kabataan, magsasaka at sa mga NGOs, peoples at civic organizations. 

Upang maipatupad ang ating mga plano ay naghain tayo sa Sangguniang Panlalawigan ng Annual Budget na may kabuuang P210,173,351.00 mababa ng P41,237,226.00 sa Annual Budget ng nakaraang taon, kung kayat ang aking mga nabanggit na cost cutting measures ay muli nating ipatutupad at tayo ay muling iisip ng mga pamamaraan kung paano pa madadagdagan ang ating financial resources sa kasalukuyan, katulad ng pagpapasa ng ating bagong Provincial Tax Ordinance na nasa Tanggapan na ng Sangguniang Panlalawigan. 

It is worthy to note, however, that for the past year we had met several barriers that in one way or the other have prevented us from performing even better. With this, I am encouraging everyone not to lose hope, instead let us give our full commitment and give value to hardwork because much is expected from us and from the government, more so at this time of economic crisis.  

We have lesser resources at our command and this strongly suggests that LGUs need to look forward and to pursue other alternative options on how we could effectively address the various concerns raised by our people. The achievements and difficulties we encountered last year are just manifestations of our own strenghts and weaknesses. Let these matters then, be a lesson and at the same time, a challenge to each and every public servant. 

I believe that much are yet to be done. I therefore look forward to a more fruitful and collaborative undertakings with the legislative branch and other government agencies.  

Naniniwala po ako na sa panahong ito ay dapat nating pag-ibayuhin ang pagtutulungan at pagkakaisa upang maging mas madali, at mabilis nating maihatid ang mga inaasahang serbisyo ng mga  mamamayan. Sa punto pong ito ay ipina-aabot ko ang aking lubos na pasasalamat, una, sa mga miyembro ng Sangguniang Panlalawigan, sa mga pinuno at kawani ng iba’t-ibang tanggapan ng Pamahalaang Lokal at Nasyonal, at sa ating mga kababayan, sa inyong napakahalagang tulong at bahagi sa paghahatid ng mga programa at serbisyo sa ating mga minamahal na mga kababayan. Inaasahan ko na patuloy ko kayong makakasama sa mga mabubuting adhikain para sa ating lalawigan.

Hilingin po natin sa Panginoon na ang kasalukuyan, at ang mga susunod pang mga taon ay maging mabiyaya para sa ating mahal na Lalawigan.  

Together, we will make Aurora rise and shine!

Mabuhay po Tayong Lahat! Mabuhay ang Lalawigan ng Aurora!